Украина президенті Владимир Зеленский Таяу Шығыс аймағына украиналық әскери контингенттің орналастырылғанын ресми түрде растады. Бұл туралы ол Британия парламентінде сөйлеген сөзінде мәлімдеді, деп хабарлайды Qaz365.kz.
Қазіргі уақытта ұшқышсыз ұшу аппараттарымен (ҰҰА) күресуге маманданған 201 сарапшы Біріккен Араб Әмірліктері, Қатар және Сауд Арабиясы сияқты аймақтың негізгі нүктелеріне бөлінген. Сонымен қатар тағы 30-дан астам маман Кувейтке аттануға дайындалуда. Бұл қадам – АҚШ пен батыс одақтастарының «дрон келісімі» аясындағы өтінішіне берілген жауап. Украиналық топтар Парсы шығанағындағы шиеленіс жағдайында араб серіктестерінің әуе қорғанысын күшейтуді көздеп отыр.
Зеленскийдің айтуынша, Украина соғыста шыңдалған бірегей әскери тәжірибесін «сенімді серіктестерге» ұсынуға дайын.
«Ешкім Украинаның соғыста тексерілген күші мен қабілетін өз қауіпсіздігінен тыс қалдырғысы келеді деп ойламаймын. Ал егер біреу қаласа, бұл ақылға қонымсыз болар еді», — деді Украина басшысы.
Бұған дейін Украинаның Иорданиядағы американдық әскери базаларын қорғау үшін дрон-ұстағыштар мен сарапшылар тобын жібергені белгілі болған еді.
Украина Ресеймен соғыс басталғалы бері ұшқышсыз ұшу аппараттарын қолдану және оларға қарсы тұру бойынша әлемдегі ең үлкен жауынгерлік тәжірибеге ие болды. Қазіргі уақытта Таяу Шығыстағы жағдайдың ушығуына байланысты аймақтағы мұнай нысандары мен стратегиялық инфрақұрылымдарды дрондардың шабуылынан қорғау мәселесі өзекті болып отыр. Украина осы бағытта халықаралық миссияларға бірігу арқылы әскери құзыреттіліктердің негізгі экспорттаушысына айналып келеді.
