Дәрігердің сөзінше, күзде вирустық инфекциялар кезеңі басталады
Күзде ауа құрғақ және салқын болады, сонымен қатар жапырақ түсетін кезең басталады. Осы уақытта аллергия күшейеді. Бұл туралы Qaz365.kz тілшісіне Түркістан қалалық ауруханасының жалпы тәжірбиелі дәрігері Әнеш Қаламқас айтып берді.
Дәрігердің сөзінше, күзде вирустық инфекциялар кезеңі басталады. ЖРВИ мен тұмау көктемге дейін жалғасады. Ауа-райының өзгеруі, маусымдық аллергендер және вирустық инфекциялар астмаға әкелуі мүмкін.
Сонымен қатар күзде ауа-райы мен атмосфералық қысымның өзгеруі артритпен ауыратын науқас санының артуына әкеледі. Күзде бұл аурулардың өршуіне жол бермеу үшін өз денсаулығыңызды бақылау, дұрыс тамақтану, иммунитетті нығайту және белсенді өмір салтын ұстану қажет.
«Өздеріңіз білетіндей, ауру күз бен қыста жиі өршиді. Салдарынан суық тиіп, вирустық инфекциялар қозуы мүмкін. Суық ауа райы басталғанда әл-қуаттың төмендеуі, шаршау, көңіл күйдің болмауы адамды мазалайды. Оған қоса, респираторлық вирустық инфекциялар күшіне енеді. Күз – суық мезгіл, әлсіреген адамның ағзасы атмосфералық қысымның тез өзгеруіне бейімделіп үлгермейді. Бұл созылмалы патологияның өршуіне ықпал етеді. Сондықтан қазірден бастап өз денсаулығыңызға назар аударып, ауырудың орнына жақсы көңіл күймен жүру үшін барлық мүмкіндікті пайдалануыңыз керек. Күзде жақсы көңіл күй, қанық ұйқы, физикалық белсенділік, сүйікті іс-шаралар, хобби иммунитетті нығайтуға, стрестен арылуға көмектеседі. Одан бөлек, салқын ауа райында ең бірінші дұрыс тамақтануға көңіл бөліп, ағзаға қажетті қоректік заттарға ақуыздарға, майларға, көмірсуларға бай тағамдарды жеген абзал. Сонымен қатар суды көп ішу керек, әсіресе таза минералды су ішу керек», – дейді Әнеш Қаламқас.
