Ерлі-зайыпты «Жыл жұбы – 2024» номинациясын жеңіп алды
«Қызық премия – 2024» кешін ұйымдастырушылар «Жыл жұбы – 2024» номинациясын құлсарылықтарға берді, деп хабарлайды Qaz365.kz.
Еске сала кетейік, былтыр бүкіл елде су тасыған кезде Құлсарыда қол ұстасып, су кешкен ерлі-зайыптылардың видеосы желіде көп тараған еді. Әйелінің қолынан ұстаған ер адам сол видеоны түсіріп алған.
«Үйленіп жатқан кезде қос аққудай көлде қатар жүзіңдер деп тост айтып еді. Сол тост 34 жылдан кейін қабыл болып, қос аққудай көлде келе келе жатырмыз», - дейді видеоны түсірген Асқар атты азамат.
Сол жұпты «Қызық премия – 2024» кешін ұйымдастырушылар бағалады. Қандай жағдай болмасын, су тасыса да, позитив тауып алған құлсарылық Асқарға інісі сол кезде қоңырау шалып, «қандай көмек керек, қандай жағдайдасыздар?» деп сұраған. Асқар сол кезде видеоны түсіріп алған.
«Қызық премия» жобасының және «Жан Әлем тревел» компаниясының атынан Асқар мен жұбайына Дубайға жолдама тарту етілді.
