14 қаңтарда Алматы халықаралық әуежайында FlyArystan әуе компаниясының жергілікті қызметкеріне жолаушы шабуыл жасады, деп хабарлайды Qaz365.kz.
Әуе компаниясы баспасөз қызметінің дерегінше, FS 7057 «Алматы – Астана» рейсінің жолаушысы тіркеу орнына ұшып шығуға 30 минут қалғанда келіп, рейске тіркелгенін растағаннан кейін тексеру аймағына өткен. Алайда отырғызу 30 минут бұрын басталатындықтан, жолаушы үлгермей қалған.
Бұдан кейін жолаушы қайтадан тіркеу аймағына оралып, оны тексеру аймағына жіберген қызметкерге агрессивті мінез көрсете бастады. Оқиға барысында жолаушы қызметкердің телефонын лақтырып жіберген. Оның беті мен ішіне соққы жасап, сөзбен қорқытуын жалғастырды. Бұл агрессиялық әрекет бейнебақылау камералары мен куәгерлердің алдында тіркелген, – делінген хабарламада.
Баспасөз қызметі әуе тасымалдаушысы өз қызметкерлеріне және басқа жолаушыларға қатысты зорлық-зомбылықтың кез келген түріне, соның ішінде физикалық шабуылдарға, қорқытулар мен балағат сөздерге нөлдік төзімділік саясатын қатаң ұстанатынын еске салды.
FlyArystan әуе тасымалдаушысы өз қызметкерлеріне және басқа жолаушыларға қатысты зорлық-зомбылықтың кез келген түріне, соның ішінде физикалық шабуылдарға, қорқытулар мен балағат сөздерге нөлдік төзімділік саясатын қатаң ұстанатынын еске салады. Деструктивті мінез-құлық көрсеткен жолаушы қолданыстағы заңнамаға сәйкес жауапқа тартылады. Әуе компаниясы өз қауіпсіздік саясаты аясында тиісті шараларды қолдану құқығын, соның ішінде жолаушыны қара тізімге енгізу мүмкіндігін сақтап қалады. Біз әр жолаушының өзінің мінез-құлқы мен басқаларға құрмет көрсету нормаларын сақтауға толық жауапты екенін ерекше атап өтеміз. Рейске уақытында келу – бұл жолаушының жеке жауапкершілігі екенін есте ұстау маңызды-, делінген хабарламада.
