Паблик авторы 17 қаңтарда ұсталған
Сенбі күні кешке сот Темірлан Еңсебекті екі айға қамауға алу туралы санкция шығарды, деп хабарлайды Qaz365.kz.
«Темірлан Еңсебекке тергеу барысында 2 ай қамауда ұстау түріндегі бұлтартпау шарасы қолданды. Естеріңізге сала кетейік, оны 174-бап бойынша «Әлеуметтік, ұлттық, рулық, нәсілдік, таптық немесе діни алауыздықты қоздыру» айыбымен соттамақшы. Біз бұл істің саяси астары бар деп есептейміз және Темірлан Еңсебекті дереу қамаудан босатуды талап етеміз», - деп жазды Qaznews24 паблигі өз парақшасында.
Qaznews24 паблигінің авторы Темірлан Еңсебек 17 қаңтарда ұсталған еді. Кеше оның үйіне тінту жүргізілген. Осыдан кейін Алматы қаласының полиция депарламенті «желіде ұлтаралық алауыздықты қоздыру фактісі бойынша қылмыстық істі тергеп жатқанын» хабарлады.
Qaznews24 паблигі сатиралық саяси әзілдерімен танымал. 57,8 мың оқырманы бар.
