Жыл басынан бері картоп бағасына қатысты 49 заң бұзушылық анықталған
Magnum мен Small сауда желілері картоп бағасын төмендетті, деп хабарлайды Qaz365.kz.
Бұл туралы ҚР Сауда және интеграция министрлігі мәлімдеп отыр.
Жыл басынан сауда үстемесін 15%-дан асырмау бойынша 20 аймақтық комиссия өтіп, олардың барысында әлеуметтік маңызы бар өнім саналатын картопқа қатысты 49 заң бұзушылық анықталған.
“Сауда министрлігінің ірі сауда желілерімен, атап айтқанда, Small және Magnum желілерімен өткізілген кездесулердің нәтижесінде, бүгінгі күні Астанадағы Small желісінде картоптың орташа бағасы 280 теңгеге, ал Magnum желісінде 185 теңгеге дейін төмендеді. Сауда комитетінің мониторингі бойынша, бүгінгі күні Қазақстан бойынша картоптың орташа бағасы 322 теңге. Әлеуметтік дүкендер мен ӘКК серіктестерінде – елдің барлық аймақтарында картоптың көлемі жеткілікті және нарықтағы бағадан төмен сатылуда”, – делінген министрлік хабарламасында.
Аталған шаралар ішкі нарықтағы бағаның төмендеуіне ықпал етпек.
