Кейбір ата-аналар балаларын еш жерге тіркемейді немесе арнайы ем алу мүмкіндігіне ие емес
Бүгін, 2 сәуір – Аутизм туралы бүкіләлемдік ақпараттандыру күні. Осы атаулы күн аясында “Жол активтері сапасының ұлттық орталығы” Алматы қалалық филиалының ұжымы арнайы оңалту орталықтарының біріне барып, ерекше балалар мен олардың ата-аналарына қолдау көрсетті, деп хабарлайды Qaz365.kz.
“Бұл күн 2007 жылдан бері атап өтіледі. Қоғамды аутизм туралы ақпараттандыру және хабардар ету мақсатында орталыққа арнайы келдік. Біздің ұжым аутист балаларды тәрбиелеп отырған ата-аналардың қиындықтарын жақсы түсінеді. Қоғам өкілдері де бұл мәселеге бей-жай қарамаса екен”, – дейді ЖАСҰО Алматы филиалының бөлім басшысы Айдар Бейспеков.
Елімізде аутизмге шалдыққан балалар саны артып келеді
Оңалту орталығының басшысы Арғын Жармұқанов Қазақстанда аутизмге шалдыққан балалар саны жыл сайын көбейіп келе жатқанын атап өтті.
“Қалада 10-нан астам осындай жекеменшік орталық бар. Біздің орталық 2019 жылы ашылған, қазіргі таңда 50 шақты бала келіп жүр. Біз балаларды оңалтуда физикалық жаттығулар мен дене қимылдарына арналған ойын әдістерін қолданамыз. Бұл тәсіл тиімді болғандықтан, ата-аналар бізді таңдайды”, – дейді орталық басшысы.
Аутизммен ауыратын балалардың нақты санын анықтау қиын. Себебі кейбір ата-аналар балаларын еш жерге тіркемейді немесе арнайы ем алу мүмкіндігіне ие емес. Бейресми деректер бойынша, Алматы қаласының өзінде аутизмге шалдыққан 4000-ға жуық бала бар.
Көк түс – аутизмді қолдаудың символы
Осы күні әлем бойынша аутизм туралы ақпараттандыру мақсатында түрлі іс-шаралар өткізіліп, ғимараттар мен ескерткіштер көк түспен жарықтандырылады. Көк түс – аутизмді қолдаудың және ерекше балаларға түсіністікпен қараудың халықаралық символы болып саналады.
Аутизм – үкім емес. Ерекше балалардың қоғамға бейімделуі үшін әрбіріміз қолдау көрсетуіміз қажет.
