Бүгін Үкімет отырысынан кейінгі баспасөз мәслихатында Еңбек және халықты әлеуметтік қорғау вице-министрі Виктория Шегай Батыс Қазақстан облысында өрттен бес баласынан айырылған отбасы туралы ақпарат берді, деп хабарлайды Qaz365.kz.
Көпбалалы отбасы ретінде тіркелген бұл шаңырақ 1,5 жасқа дейінгі бала күтіміне байланысты мемлекеттік жәрдемақы алып келген. Жалпы мөлшері 134 мың теңге көлеміндегі жәрдемақы төленіп отырған.
Сонымен қатар, вице-министр қазіргі таңда баласынан айырылған аналарға арнайы жәрдемақы қарастырылмағанын атап өтті. Бұл бағытта әлеуметтік қорғау саласында жүйелі өзгерістер қажеттігі де айтылды.
Отбасының отағасы жұмыс істеген, оның айлық жалақысы шамамен 190 мың теңге көлемінде болған. Осыған сәйкес, отбасының жан басына шаққандағы табыс мөлшері 47 мың теңгені құраған.
Алайда вице-министрдің айтуынша, отбасы жергілікті атқарушы органдарға әлеуметтік көмек алу үшін өтініш білдірмеген.
Айта кетейік, Виктория Шегай күні кеше вице-министр болды.
