Темекі тұтынатын ер адамдардың үлесі 34 пайызды құраған.
Ұлттық статистика бюросы Қазақстан халқы арасында темекі өнімдерін тұтынуға байланысты сауалнама жүргізді. Зерттеу еліміздің барлық облысында, сондай-ақ Астана, Алматы және Шымкент қалаларында өтті, деп хабарлайды Qaz365.kz.
Сауалнамаға 15 жастан асқан, 12 мың үй шаруашылығынан бір-бір мүшеден қатысқан.
Жүргізілген зерттеу нәтижелері бойынша, қазіргі таңда темекі шегетіндердің үлесі халықтың жалпы санының 17,5 пайызын құрайды. Ал 2024 жылы бұл көрсеткіш 20,7 пайыз деңгейінде болған, - делінген хабарламада.
Ауылдық жерлерде темекі шегетіндердің үлесі – 19,1 пайыз, ал қалалық жерлерде – 16,7 пайыз. Темекі тұтынушылардың 93,8 пайызы өнеркәсіптік жолмен өндірілген темекі өнімдерін (сигарет) шегеді.
Темекі тұтынатын ер адамдардың үлесі – 34 пайыз, ал әйелдер арасында – 5 пайыз.
Еске сала кетейік, 1 шілдеден бастап темекі өнімдеріне (фильтрі бар, фильтрі жоқ сигареттер, папиростар, сигариллалар және қыздырылатын темекі өнімдері) ең төменгі бөлшек сауда бағаларын белгілеу туралы бұйрық күшіне енді.
