Алматыда жол мамандарына арналған тәжірибелік сабақ ұйымдастырылды
Алматы қаласындағы Жол активтері сапасының ұлттық орталығы (ЖАСҰО) Алматы автомобиль жол колледжінің 3 курс студенттері үшін ашық есік күнін өткізді. “Автомобиль жолдары және аэродромдар құрылысы” мамандығында білім алып жатқан болашақ жол саласы мамандарына орталықтың Жылжымалы жол зертханасы (ЖЖЗ) таныстырылды. Арнайы есептеу-өлшеу құралдарымен, заманауи құрылғылармен жабдықталған зертханалық көліктің жұмыс принциптері мен мүмкіндіктері көрсетіліп, студенттердің кәсіби қызығушылығына нақты жауап берілді, деп хабарлайды Qaz365.kz.
Іс-шара барысында ЖАСҰО Алматы қалалық филиалының инженері Глеб Бакашаров студенттерге мекеме қызметінің негізгі бағыттары туралы кеңінен баяндап берді:
«Жол сапасы – қауіпсіздік кепілі. Біз зертханалық сынамалар арқылы жолдың әр қабатының беріктігін тексереміз. Мұндай шаралар студенттердің кәсіби дамуына оң әсер етеді», – деді инженер.
Сондай-ақ ол жастардың техникалық білімін тәжірибемен ұштастыру маңызды екенін атап өтті:
«Ашық есік күндері студенттерге нақты өндірістік үдерістерді көзбен көріп, мамандықты терең түсінуге мүмкіндік береді», – деп өз пікірін білдірді.
Жол саласына қызығатын жастар үшін мұндай шаралар алдағы уақытта да жалғасын таппақ. Мақсат – келешек мамандардың кәсіби даярлығын арттырып, оларды еңбекке бейімдеу.
