Түркістан қаласы, Бекзат тұрғын алқабында «Отбасын қолдау орталығы» мамандары мен құқық қорғау қызметкерлері бірлесіп «Тәртіп – тәрбие бастауы» атты профилактикалық іс-шара өткізді, деп хабарлайды Qaz365.kz.
Шара отбасы тәрбиесінің қоғамдағы орны мен маңызын насихаттап, ата-аналардың тәрбие беру ісіндегі жауапкершілігін арттыруға бағытталған. Сонымен қатар, отбасындағы тәрбиенің сапасын арттыру арқылы қоғамда тұрақтылық пен адамгершілік құндылықтарды қалыптастыруға көмек береді. Бұл іс-шара арқылы ата-ана, бала және қоғам арасындағы өзара жауапкершілік, тәртіп пен тәрбие байланысы, құқықтық және моральдық ортақтық сынды ұғымдар кеңінен талқыланды дейді мамандар.
Бастама отбасы институтының маңыздылығын арттырып, ата-ана мен бала арасындағы байланысты тереңдетуге, ұрпақ тәрбиесінде тәртіп пен жауапкершілік ұғымдарын орнықтыруға үлкен үлес қосады. Шара барысында қатысушыларға ұлттық тәрбие құндылықтары, қоғамдағы құқықтық мәдениет, бала тәрбиесіндегі ата-ананың рөлі, сондай-ақ отбасындағы өзара құрмет пен сенімді қарым-қатынас туралы кеңінен ақпарат берілді. Сондай-ақ, отбасы мүшелерінің бір-біріне деген көзқарасын нығайтатын нақты әдіс-тәсілдермен бөлісті.
Сонымен қатар, кездесуде жасөспірімдер арасындағы тәртіп бұзушылықтың алдын алу, ата-ананың бақылауын арттыру, мейірім мен жауапкершілікке тәрбиелеу мәселелері кеңінен талқыланды. Мұндай кешенді жұмыстар қоғамда отбасылық құндылықтардың рөлін арттыруға, ұлттық тәрбиенің негізінде адамгершілік қасиеттерді ұлықтауға оң ықпал ететіні атап өтілді. «Тәртіп – тәрбие бастауы» жобасы алдағы уақытта да Түркістан өңірінде тұрақты түрде өткізіліп, кең ауқымды ақпараттық-тәрбиелік алаңға айналмақ.
