Түркістан қаласындағы «Отбасын қолдау орталығында» Түркістан қалалық полиция басқармасының отбасылық-тұрмыстық зорлық-зомбылыққа қарсы күрес бөлімінің инспекторларының қатысуымен «Ата Заң – Тәуелсіздік тірегі» атты шара өтті, деп хабарлайды Qaz365.kz.
Іс-шара азаматтардың құқықтық сауаттылығын арттыру, отбасы құндылықтарын насихаттау, мемлекеттік бағдарламалар мен заң нормалары бойынша кеңес беру және отбасындағы зорлық-зомбылық жағдайында әрекет ету жолдарын түсіндіру мақсатында ұйымдастырылған. Кездесуге қатысқан заңгер Айни Түймебаева келушілерге арнайы құқықтық түсіндірме жұмыстарын жүргізді. Ол қазіргі таңда қоғамда азаматтардың құқықтық сауаттылығын арттыру – маңызды әрі өзекті мәселе. Әсіресе, отбасы институтының нығаюы үшін әрбір адамның өз құқығы мен міндетін білуі аса қажеттігін айтты.
Оның сөзінше отбасындағы татулық, сенім мен өзара құрмет – заң аясында ғана нығая түседі. Мысалы, ерлі-зайыптылардың мүліктік құқықтары, баланың тәрбиесі мен білім алуына қатысты ата-ананың жауапкершілігі, зорлық-зомбылықтан қорғау – бәрі де заңмен реттелген. Егер әрбір отбасы мүшесі осы құқықтық нормаларды біліп, сақтаса, дау-жанжал мен түсінбестік едәуір азаяды.
Заңды білу – тек өзіңді қорғау емес, өзгеге зиян келтірмеу мәдениетін қалыптастыру. Осы тұрғыдан алғанда, құқықтық сауаттылық – отбасылық құндылықтардың негізі болып табылады. Сондықтан азаматтар өз құқықтарын білуге, заңнаманы түсінуге, заңгерлердің кеңесіне жүгінуге тартынбауы керек. Қоғамда өз орнын табу, отбасының бірлігін сақтау және болашақ ұрпаққа дұрыс тәрбие беру – осының барлығы құқықтық мәдениеттің қалыптасуымен тығыз байланысты.
