Кезекті операция 13 тамызға белгіленген.
Шымкент қаласы әкімінің орынбасары Руслан Берденовке тағы бір операция жасалады. Дәрігерлер оның денесінде қалған аңшы мылтығының бытыраларын алып тастауды жоспарлап отыр. Бұл туралы Tengrinews.kz сайтына жәбірленушінің өкілі Жеңіс Тыныбек хабарлады, деп жазады Qaz365.kz.
Оның айтуынша, қазір Берденов Алматыдағы клиникалардың бірінде ем қабылдап жатыр. Кезекті операция 13 тамызға белгіленген.
Еске салсақ, шенеуніктің денесінде әлі күнге дейін 60-тан астам металл бытыра бар. Бұл туралы Берденов әлеуметтік желідегі парақшасында жазып, рентген суретін жариялаған. Ол өзіне бағытталған түрлі айла мен жалған айыптауларға қарамастан, әділ әрі ашық сотқа сенетінін атап өтті.
6 шілдеде Шымкентте басталған қастандық ісі бойынша сот процесінің алғашқы отырысына Берденов қатыспады. Алайда өкілінің айтуынша, ол тараптардың жарыссөзіне дейін сотта көрінуі мүмкін. Бұл дәрігерлердің қорытындысына байланысты.
Қастандық биыл 21 сәуірде қала әкімдігі ғимаратының маңында болған. Ернар Жиембай Берденовке оқ атып, шенеунік ауруханаға жеткізілді. Операция шамамен төрт сағатқа созылған. Жиембай қамауға алынып, оған адам өлтіруге оқталу бабы бойынша айып тағылуда.
