Түркістан қаласындағы «Отбасын қолдау орталығының» психолог маманы Гүлмира Маралбекқызының сөзінше орталыққа жүгінентіндердің басым бөлігі отбасылық қатынастарға қатысты кеңес сұрайды, деп хабарлайды Qaz365.kz.
«Соңғы жылдары әйелдердің орталыққа жүгіну себептері әртүрлі болып отыр. Ең алдымен, бізге келетіндердің басым бөлігі отбасылық қатынастарға қатысты кеңес сұрайды. Жұбайымен түсініспеушілік, жанжалдар, ажырасу алдында туындайтын күдіктер – жиі кездесетін жағдайлар. Сонымен қатар, көптеген әйелдер психологиялық қолдау іздейді. Күнделікті күйзеліс, эмоциялық шаршау, өз-өзіне сенімсіздік – заманауи өмірдің басты мәселелерінің бірі. Мұндай сәтте маман тарапынан дұрыс бағыт беру әйелдің ішкі тепе-теңдігін қалпына келтіруге көмектеседі. Әйелдер бізге тек отбасылық мәселемен ғана емес, балалардың тәрбиесі, олардың мінез-құлқы немесе үлгеріміне қатысты сұрақтармен де жиі келеді. Жасөспірім кезеңдегі қиындықтар, ата-ана мен бала арасындағы алшақтық – ерекше назарды қажет етеді. Тағы бір маңызды бағыт – әлеуметтік және құқықтық мәселелер. Тұрмыстық жағдайдың қиындығы, алимент өндіру, жұмысқа орналасу, мемлекеттік бағдарламаларға қол жеткізу бойынша кеңес қажет ететіндер де аз емес»,- деді маман.
Маманның пікірінше өкінішке қарай, кейбір әйелдер тұрмыстық зорлық-зомбылық салдарынан көмек сұрап келеді. Мұндай жағдайда орталық қызметкерлері тек психологиялық емес, құқықтық кеңес беріп, тиісті мекемелермен байланыс орнатуға көмектеседі. Жалпы алғанда, әйелдерге арналған мұндай орталықтардың негізгі мақсаты – қолдау көрсету, бағыт беру және сенімді серік болу. Себебі, кейде адамның тек тыңдаушысы болып, жанашырлық танытуының өзі оның өмірінде үлкен өзгеріс әкелуі мүмкін.
