Түркістан қаласындағы «Отбасын қолдау орталығы» – отбасы институтын нығайту мен гендерлік теңдікті қамтамасыз етуде маңызды жұмыс атқарып келеді, деп хабарлайды Qaz365.kz.
«Отбасын қолдау орталығының» психолог маманы Гүлмира Маралбекқызының сөзінше гендерлік саясат – әйел мен ердің қоғамдағы орнына тең қарау, олардың құқықтары мен бостандықтарын сақтап, әлеуетін толық пайдалануға жағдай жасау. Бұл саясаттың басты мақсаты – әйелдің тек отбасы шеңберінде ғана емес, қоғам өмірінің барлық саласында белсенді болуына мүмкіндік беру. Ал отбасы институтын нығайту арқылы – елдің әлеуметтік-экономикалық дамуына тікелей әсер ету.
«Түркістан қаласындағы «Отбасын қолдау орталығы» - отбасылық кеңес беру арқылы ерлі-зайыптылар арасындағы түсіністі арттырып, отбасындағы жанжалдардың алдын алады. Бұл – берекелі отбасының қалыптасуына ықпал етеді. Сонымен қатар, психологиялық қолдауды әйелдерге де, ерлерге де көрсетіледі. Себебі эмоционалды тұрақтылық – отбасы татулығының басты шарты. Одан бөлек, тұрмыстық зорлық-зомбылықтың алдын алуға, әйелдердің құқығын қорғауға және отбасы заңнамаларына қатысты сауаттылықты арттыруға бағытталған құқықтық кеңестер береді. Орталық әйелдердің кәсіп ашуына, ерлердің еңбекке белсенді араласуына да жағдай жасайды. Бұл – отбасының материалдық тұрақтылығын қамтамасыз етеді. Психолог маман ретінде айтарым, отбасылық саясат пен гендерлік саясат бір-бірінен бөлек қарастырылмауы тиіс. Әйел мен ердің рөлі тең дәрежеде бағаланғанда ғана отбасы берік болады. Ал берік отбасы – қоғамдағы тұрақтылықтың, демографиялық өсімнің және ұрпақ тәрбиесінің кепілі. Сондықтан Түркістан қаласындағы «Отбасын қолдау орталығының» жұмысы – отбасы мен гендерлік саясатты жергілікті деңгейде жүзеге асырудың нақты көрінісі», - деді маман.
