Бірқатар мамандық қажетсіз болып қалады.
Еңбек және халықты әлеуметтік қорғау вице-министрі Олжас Анафиннің айтуынша, елімізде жасанды интеллектіні дамыту үшін білікті кадрлар жетіспейді, деп хабарлайды Qaz365.kz.
Қазіргі таңда ең көп сұранысқа ие мамандықтар – data scientist, машиналық оқыту инженерлері, деректер инженері, деректер талдаушысы мен интерпретаторы, сондай-ақ этика саласының мамандары мен ІЖ-аудиторлар.
Маман тапшылығының негізгі себептері – арнайы оқу бағдарламаларының аздығы, білікті кадрлардың шетелге кетуі және саладағы еңбекақының төмендігі.
Сонымен қатар жасанды интеллектінің дамуы бірқатар дәстүрлі кәсіптердің қысқаруына алып келеді. Алдағы жылдары бастапқы деңгейдегі бухгалтерлер, станок операторлары, конвейер жұмысшылары, ораушылар мен кассирлердің жұмысы азаюы мүмкін.
Байқаған шығарсыздар, қазір ірі сауда желілерінде кассирлердің орнына өзіне-өзі қызмет көрсету кассалары қойылып жатыр. Бұл үрдіс алдағы уақытта одан әрі күшейе түседі, – дейді Олжас Анафин.
