Түркістан қаласындағы «Отбасын қолдау орталығы» директоры Мария Сартайқызы мен «Оқушылар сарайы» директоры Индира Сарқытқызы өзара ынтымақтастық туралы меморандумға қол қойды, деп хабарлайды Qaz365.kz.
Меморандумның мақсаты — қиын өмірлік жағдайға тап болған отбасылар мен олардың балаларына жан-жақты көмек көрсету, білім беру мен тәрбие сапасын арттыру, қосымша білім беру саласында жаңа әдістерді енгізу арқылы оқушылардың жан-жақты дамуына жағдай жасау. Құжат аясында екі мекеме қиын жағдайдағы отбасыларға психологиялық және әлеуметтік көмек көрсету, балалардың бос уақытын тиімді ұйымдастыру, қосымша білім беру үйірмелері мен секцияларын кеңейту, тәрбиелік іс-шараларды бірге өткізу, маман алмасу және тәжірибе бөлісу және Ата-аналармен тұрақты байланыс орнату бағыттары бойынша бірлесіп жұмыс атқаруға келісті.
"Бұл меморандум – балаларға деген ортақ қамқорлығымыздың нақты көрінісі. Біз тек көмек көрсетумен шектелмей, олардың толыққанды дамуына мүмкіндік беретін жағдай жасауды көздейміз. Ынтымақтастық арқылы әр бала өз әлеуетін ашуға жол табады," – деді «Отбасын қолдау орталығының» директоры Мария Сартайқызы.
Шара барысында қатысушылар екі мекеменің бір-бірін толықтыратын әлеуетіне ерекше тоқталып, Түркістан қаласындағы әлеуметтік тұрақтылықты сақтау мен балалардың болашағына салынған инвестиция ретінде бұл келісімді жоғары бағалады.
"Бүгінгі келісім – біздің ортақ жауапкершілігіміздің дәлелі. Қосымша білім беру саласында балалардың қызығушылығын оятып, шығармашылық әлеуетін дамытатын жобалар көп болады деп сенеміз. Бұл жұмыс – бір күндік емес, жүйелі, тұрақты әрекетке негізделмек," – деп атап өтті Индира Сарқытқызы, «Оқушылар сарайының» директоры.
Айта кетейік, алдағы уақытта меморандум аясында түрлі тренингтер, семинарлар, ата-аналарға арналған психологиялық кеңестер мен ашық есік күндері ұйымдастырылмақ.
