Түркістан қаласындағы «Отбасын қолдау орталығы» мен қалалық полиция департаменті бірлесіп, өмірлік қиын жағдайға тап болған аналарға арналған қолдау шарасын өткізді, деп хабарлайды Qaz365.kz.
Іс-шара аясында «Ажырасу және оның салдары», «Тұрмыстық зорлық-зомбылықтың алдын алу», «Өмірлік қиын жағдайға тап болған отбасыларға көмек көрсету» сынды маңызды тақырыптар кеңінен талқыланды. Жиынға әлеуметтік сала мамандары, психологтар, заңгерлер және учаскелік полиция инспекторлары қатысып, нақты кеңестер берді. Психолог маман тарапынан ұйымдастырылған тренинг барысында аналарға эмоциялық тұрақтылықты сақтау, күйзелісті жеңу және ішкі ресурсты қалай қалпына келтіруге болатыны жөнінде практикалық жаттығулар жүргізілді. Қатысушылар өзара тәжірибе алмасып, бір-біріне қолдау білдірді.
Полиция қызметкерлері тұрмыстық зорлық-зомбылықтың алдын алу бағытында атқарылып жатқан жұмыстар туралы айтып, құқықтық көмек алу жолдарын түсіндірді. Сондай-ақ, зорлық-зомбылық фактісі орын алған жағдайда қайда жүгіну керектігі, жедел әрекет ету механизмдері туралы мәлімет берілді. Іс-шараның негізгі мақсаты – аналардың құқықтық сауаттылығын арттыру, қиын жағдайдан шығу жолдарын көрсету, психологиялық қолдау көрсету және отбасындағы татулық пен берекені сақтау. Сонымен қатар, мемлекет тарапынан көрсетілетін әлеуметтік қызметтер туралы кеңірек ақпарат беру арқылы аналарды белсенді өмірге қайта тарту көзделуде.
Мамандар мұндай шаралар тек бір реттік емес, жүйелі түрде ұйымдастырылуы тиіс екенін айтып, алдағы уақытта аналар клубы, психологиялық оңалту курстары, заңгерлік кеңестер апталығы сияқты бастамалар қолға алынатынын жеткізді.
