Түркістан қаласында жастар мен ардагерлер арасындағы сабақтастықты нығайту, ұлттық тәрбие мен отбасылық құндылықтарды дәріптеу мақсатында тағылымы мол кездесу өтті, деп хабарлайды Qaz365.kz.
Бұл шараны ұйымдастыруға ұйытқы болған – «Белсенді ұзақ өмір» орталығы. Кездесуге орталықтың белсенді мүшелері, өмірлік тәжірибесі мол, ақ жаулықты әжелер арнайы шақырылды. Кездесу барысында ардақты аналарымыз өздерінің өмір жолынан сыр шертіп, жастарға тәрбие мен тәлімге толы әңгімелер айтты. Олар отбасы құндылықтары, ата-ананы құрметтеу, үлкенге ізет, кішіге қамқор болу, сондай-ақ ұрпақтар арасындағы байланыстың маңыздылығы жайлы жүрекжарды ойларымен бөлісті. Шараның басты мақсаты – отбасы құндылықтарын ұлықтап, ұрпақтар сабақтастығын нығайту. Әжелер өмірлік тәжірибелерімен бөлісіп, ұлттық тәрбие, ізгілік пен сыйластық жайлы тағылымды әңгімелер айтты. Ардақты әжелер мен жастардың кездесуі – жай ғана кездесу емес, рухани тәрбие мен ұлттық құндылықтарды ұрпақ санасына сіңірудегі маңызды қадам. Осындай шаралар – жас ұрпаққа бағыт-бағдар беріп, оларды отбасын, елін, жұртын қадірлейтін азамат етіп тәрбиелеудің маңызды құралы.
Ұлттық тәрбиенің алтын қазығы саналатын – мейірімділік, сабырлылық, сыйластық сынды қасиеттерді әжелер жастарға мысалдар арқылы жеткізді. Әңгіме барысында жастар тарапынан да түрлі сұрақтар қойылып, еркін пікір алмасу орын алды. Бұл тағылымды басқосу – ұрпақтар сабақтастығының жарқын көрінісі ғана емес, сонымен қатар жас ұрпақтың бойында жауапкершілік, рухани құндылықтар мен отбасылық берекені ұлықтау сезімін оятуға бағытталған маңызды шара болды. Осындай кездесулер арқылы жастар үлкен өмірге бағыт алып, ұлттық рухпен сусындап өсері анық.
