Түркістан қаласындағы «Отбасын қолдау орталығының» психолог маманы Гүлмира Маралбекқызының сөзінше Түркістан қаласында отбасы институтын сақтау, ұлттық дәстүрді дәріптеу және әйелдердің қоғамдағы мәртебесін арттыру мәселелері күн тәртібінен түспей келеді. Осы мақсатта қалада түрлі семинарлар, тренингтер мен тәрбиелік бағыттағы іс-шаралар тұрақты түрде ұйымдастырылып, отбасылық құндылықтардың ұрпаққа жеткізілуі үшін ауқымды жұмыстар атқарылуда, деп хабарлайды Qaz365.kz.
«Қазіргі заманның қарбалас ырғағында отбасылардың бір-бірімен түсінісуі, жан-жақты қолдау көрсетуі қиынға соғуда. Сондықтан да Түркістанда өткізілетін семинарлар мен отбасылық шаралар – үлкен маңызға ие бастамалар. Олар отбасыларға тек ақпараттық қолдау көрсетіп қана қоймай, жан-жақты мәселені ашық талқылауға мүмкіндік береді. Ата-ана мен бала арасындағы қарым-қатынасты күшейту арқылы, эмоционалдық байланысты арттыру – тәрбиенің тиімділігін ұлғайтады. Сонымен қатар, әйелдердің отбасындағы және қоғамдағы рөлін көтеру – ұрпақ тәрбиесіне тікелей ықпал ететін басты факторлардың бірі», – дейді маман.
Психологтың пікірінше, мұндай іс-шаралар арқылы ата-аналарға баланы тек оқытып қана қоймай, жанұялық үйлесімді сақтау жолдары үйретіледі. Оған қоса, жас аналарға арналған мотивациялық тренингтер олардың өзін-өзі дамытуына, қоғамдағы белсенділігі мен жауапкершілігін арттыруға көмектеседі.
Түркістан қаласы отбасы құндылықтарын сақтау және нығайту бағытында жүйелі жұмыстар атқарып жатқан өңірлердің бірі болып табылады. Мұндай бастамалар қоғамның рухани тұтастығын нығайтып, ұлттық тәрбиенің берік іргетасын қалыптастыруға септігін тигізуде. Сонымен бірге, бұл әрекеттер келешек ұрпақтың саналы, мәдениетті, салиқалы азамат болып қалыптасуына негіз болмақ.
