Мораторий 16 қазанда енгізілген еді
Қазақстанда АИ-92 бензині мен дизель отынының бағасын өсіруге тыйым салу кем дегенде 2026 жылдың көктеміне дейін жалғасады. Бұл туралы вице-премьер – Ұлттық экономика министрі Серік Жұманғарин Мәжілістегі брифингте мәлімдеді, деп хабарлайды Qaz365.kz.
Министрдің сөзінше, мораторийдің мерзімін ұзарту шешімі нарықты тұрақтандыру және бағаның күрт өсуіне жол бермеу мақсатында қабылданған.
– Мораторий кемінде келесі жылдың көктеміне дейін күшінде болады. Алдымен көрші елдердегі жағдайдың тұрақтануын күтуіміз керек. Біз баға айырмасын қысқартуға тырысқанымызбен, ол қайтадан артып отыр. Бұған екі негізгі фактор әсер етеді: айырбас бағамының өзгеруі және кейбір көрші мемлекеттерде жанармай тапшылығының туындауы. Ал тапшылық бағаны қымбаттатады, – деді Жұманғарин.
Энергетика министрі Ерлан Ақкенженов бұған дейін мораторий инфляция деңгейі «қолайлы шекке» түскенше сақталады деп мәлімдеген болатын.
Жұманғариннің айтуынша, Қазақстанда жанармай бағасы мемлекеттік реттеу аясында ұсталып отыр, ал көрші елдерде мұндай механизм жоқ.
– Бізде баға саясаты мен салалық реформалар ашық талқыланады, бірақ басқа мемлекеттерде бұл үдерістердің ашықтығы төмен. Бұл да баға тұрақтылығына әсер етеді, – деді министр.
