Алматыдағы ірі сауда желілері азық-түлік бағасын көтермеуге келісті

Алматы қаласының әкімдігі мен ірі сауда желілері Magnum, Small және Toimart арасында бағаның негізсіз өсуіне жол бермеу туралы меморандумға қол қойылды. Бұл туралы қала әкімінің баспасөз қызметі хабарлады, деп жазады Qaz365.kz.

Құжатқа сәйкес, аталған ритейлерлер жыл соңына дейін әлеуметтік маңызы бар азық-түлік тауарларына сауда үстемесін 15%-дан асырмауға міндеттенді.

Бағаны тұрақтандыру мақсатында өнімдер отандық өндірушілерден тікелей жеткізіледі.

Атап айтқанда:

• тауық еті – «Алатау-Кус», «Отан Грин Фуд», «Наурыз Агро» компанияларынан;
• бірінші санаттағы жұмыртқа – «Сары-Бұлақтан»;
• күріш – «Асыл Дәннен»;
• қант – «КаистИнвест» кәсіпорнынан жеткізіледі.

Қала әкімдігі мен ритейлер өкілдері бұл шара тұрғындар үшін азық-түлік бағасының тұрақтылығын қамтамасыз етуге бағытталғанын атап өтті.