Қазақстанның оңтүстік өңірлерінде 2026 жылғы вегетациялық кезеңде су ресурстарының тапшылығы сезілуі мүмкін. Су ресурстары және ирригация министрлігі қолданысқа енгізіп жатқан Talsim-NG моделінің болжамы осындай қауіпті көрсетіп отыр,деп хабарлайды Qaz365.kz.
Министр Нұржан Нұржігітовтің мәлімдеуінше, биыл Сырдария мен Талас өзендерінің бассейндерінде су деңгейі көпжылдық нормадан айтарлықтай төмен болады деп күтілуде. Бұл жағдайға негізінен 2025 жылы жауын-шашынның аз түсуі мен таулы аймақтардағы ылғал қорының жеткіліксіздігі себеп болып отыр.
Сырдария бассейні: Маңызды стратегиялық нысан – Тоқтоғұл су қоймасының көлемі былтырғы көрсеткіштен 1,5 км³-ге азайған. Бұл Түркістан облысының Мақтаарал және Жетісай аудандарын «Достық» каналы арқылы сумен қамтамасыз етуге тікелей қауіп төндіреді.
Жамбыл облысы: Өңір үшін шешуші маңызы бар Киров су қоймасындағы су көлемі қазіргі уақытта 314 млн м³-ді құрайды. Бұл өткен жылмен салыстырғанда 1,5 есе төмен көрсеткіш.
Іле және Шу өзендері: Бұл бағыттарда жағдай біршама тұрақты болғанымен, өзен ағынының біркелкі болмауы суды бөлуде қиындықтар туғызуы мүмкін.
