Бүгін Қазақстан Президенті Қасым-Жомарт Тоқаев барша отандастарымызды қасиетті Ораза айт мерекесімен құттықтады. Мемлекет басшысы өз жолдауында бұл мейрамның рухани тазару, парасаттылық пен жанашырлық құндылықтарын дәріптейтін айрықша маңызын атап өтті, деп хабарлайды Qaz365.kz.
Биылғы Ораза айттың ерекшелігі – оның Наурыз мейрамымен қатар келуі. Президент бұл сәйкестіктің символдық мәні зор екенін және ел дамуындағы жаңа тарихи кезеңнің жаршысы болғанын айтты. Ол отыз күн ораза тұтқан жұрттың төзімі шыңдалып, мұқтаж жандарға қол ұшын созу арқылы қоғамның берекесін арттыруға үлес қосқанын тілге тиек етті.
Құттықтау барысында Қасым-Жомарт Тоқаев ел өміріндегі маңызды саяси оқиға – Жаңа Ата заңның қабылдануына да тоқталды. Ол Қазақстан халқының конституциялық реформаны жаппай қолдауы арқылы Әділеттілік пен Өркендеуге бастайтын жолды таңдағанын, бұл ұлт тарихындағы жаңа парақ екенін жеткізді.
«Баршаңызға зор денсаулық, бақ-береке, толайым табыс тілеймін! Еліміз аман, жеріміз тыныш болсын! Ораза айт қабыл болсын!» – деді Мемлекет басшысы өз сөзінің соңында.
