Қазақстанда азаматтардың денсаулық жағдайына және жинақталған еңбек өтіліне байланысты зейнетке мерзімінен бұрын шығу мүмкіндігін енгізу ұсынылды. Мұндай бастаманы Сенат депутаты Амангелді Нұғманов өзінің депутаттық сауалында көтерді, деп хабарлайды Qaz365.kz..
Сенатордың айтуынша, елдегі зейнетке шығу жүйесін тек жас мөлшеріне ғана емес, еңбек өтіліне негізделген модельге кезең-кезеңімен көшіру қажет. Бұл ретте әскери қызметшілер мен құқық қорғау органдары қызметкерлерінде бар «еңбек сіңірген жылдары үшін» зейнетке шығу тәжірибесін қарапайым азаматтарға да қолдану ұсынылып отыр. Депутат мұндай реформа жұмыссыздық деңгейін төмендетуге және БЖЗҚ мен мемлекеттік бюджетке түсетін салмақты азайтуға көмектесетінін атап өтті.
Сонымен қатар Нұғманов мүгедектік тобы белгіленбесе де, созылмалы немесе кәсіби аурулары бар азаматтарға медициналық көрсеткіштер бойынша зейнетке ерте шығу құқығын беруді ұсынды. Егер азамат уақыт өте келе денсаулығын түзеп, еңбекке қабілеттілігін қалпына келтірсе, ол жұмысын қайта жалғастыра алады. Бұл норманы әлеуметтік әділеттілікті арттыру үшін Әлеуметтік кодекске енгізу қажеттігі айтылды.
Айта кетейік, 2024 жылдың қарашасынан бастап Еңбек және халықты әлеуметтік қорғау министрлігі зейнетке ерте шығу мәселесін қарастырып жатқанын хабарлаған болатын. Алайда 2025 жылдың маусымындағы мәлімет бойынша, бұл мәселе әлі де талқылау сатысында қалып отыр. Сенатор бұл ұсыныстарды кәсіби деңгейде пысықтау үшін арнайы ведомствоаралық жұмыс тобын құруды сұрады.
