Естеріңізде болса, 30 желтоқсан күні Шымкент қаласының тұрғыны кәмілетке толмаған қызының жоғалғаны туралы шағымданған болатын
Бұл туралы танымал заңгер Айгүл Орынбек фейсбук парақшасында өткізген тікелей эфирінде мәлімдеді, деп хабарлайды Qaz365.kz.
Естеріңізде болса, 30 желтоқсан күні Шымкент қаласының тұрғыны кәмілетке толмаған қызының жоғалғаны туралы шағымданған болатын. Іздестіру жұмыстарының нәтижесінде полиция қызметкерлері жоғалған қызды 7 күннен соң, темір жол вокзалынан тапты. Қыздың айтуынша, үйден қашып кетуіне анасының ұрып-соғуы себеп болған.
Алайда Айгүл Орынбектің айтуынша, құзырлы орган қызметкерлері табылған қыздың зорланғанын жасырып қалған. Заңгер аталған оқиғаға байланысты үлкен заңбұзушылық орын алып жатқанын және бұл іске ҚР Бас прокуроры Берік Асыловтың да араласуын сұрап отыр.
«Жоғалған қызды барлықтары, тіпті, Шымкент қаласының балалар құқығын қорғап жүрген омбудсменнің өзі тексерді. Барлығы жайында, барлығы орнында деген еді. Жаңа анасы екеуіміз барып, қызды өзіміз тексерттік. Қыз қыз болмай шақты, зорланған. Енді осы істің барлығын жауып отырған Шымкент қаласы полиция департамент басшысы, Шымкент қаласы прокуроры маған жауап берсе екен. Себебі біздің прокуратураға арыз тастап кеткенімізге 15 күннен асып кетті. Әлі күнге жауап жоқ. Не үшін? Мен қызды тексерген эсперттердің үстінен де қылмыстық іс қозғауды сұраймын. Себебі бізге қыз табылғалы бері Шымкент ПД басшылығынан, тергеушілерден ешкім хабарласқан жоқ», – деді А.Орынбек.
Сонымен қатар оқиға қылмыскерлерді жасыру мақсатында бұрмалануы мүмкін екенін, сондай-ақ кәмілетке толмаған қыздың берген жауабы әдейі анасына қарсы жасалғаны күмән тудырып тұрғанын алға тартты.
«Мен қылмыскерлерді жасыру мақсатында әдейі қызға анасына қарсы ақпарат бергізді деп ойлаймын. Себебі менде қыздың маған айтып берген бүкіл сөздері бар. Маған көзі кішкентай апай “солай айтпасаң, сенің мамаңды аналық құқығынан айырамыз” деп айтты дейді. Яғни, бұның барлығына менің тарапымнан арыз түскен. Алайда бұл істен ешқандай хабар жоқ», – деді заңгер.
