Алматылық «Қайраттың» Чемпиондар лигасының негізгі кезеңіне жолдама алған тарихи жеңісінен кейін команда өкілдері лайықты құрметке бөленді. Әсіресе бас бапкер Рафаэль Уразбахтин мен бір күнде ел қаһарманына айналған қақпашы Темірлан Анарбеков ерекше атап өтілді, деп хабарлайды Qaz365.kz.
Astana Motors компаниясының негізін қалаушы Нұрлан Смағұлов клуб өкілдерімен кездесіп, бапкер мен қақпашыға арнайы сый-сияпат жасады. Рафаэль Уразбахтинге Hyundai Palisade көлігінің кілтін табыстаса, пенальти сериясында қарсыластың үш соққысын қайтарып, «Қайратты» Чемпиондар лигасының топтық кезеңіне алып шыққан Темірлан Анарбековке Apple планшетін сыйлады. Бұл марапат олардың қажырлы еңбегі мен табандылығына берілген жоғары баға ретінде қабылданды.
Айта кетейік, шешуші ойында «Селтикке» қарсы өткен пенальти сериясында Анарбеков қатарынан үш соққыны кері қайтарып, алматылықтарды тарихи жеңіске жеткізді. Осылайша, «Қайрат» Қазақстан тарихында Чемпиондар лигасының негізгі кезеңіне шыққан екінші команда атанды. Бұған дейін мұндай жетістікке тек елордалық «Астана» (2015/16 маусымында) қол жеткізген болатын. Енді алматылық клуб Еуропаның алпауыт командаларымен кездесуге дайындалуда.
