УЕФА Чемпиондар лигасының топтық кезеңіндегі бұл ойын 30 қыркүйекте Алматыда өтеді.
«Қайрат» футбол клубы жанкүйерлерге УЕФА Чемпиондар лигасы ойындарына билеттерді тек ресми сатылым арналары арқылы алу қажеттігін ескертті. Бұл туралы клубтың Telegram-арнасында хабарланды, деп жазады Qaz365.kz.
Клуб өкілдерінің айтуынша, сатылым басталар алдында жалған хабарландырулар мен билеттерді қайта сату әрекеттері көбейген.
Үшінші тұлғалардан немесе бейресми арналар арқылы алынған билеттердің күші жойылады. Мұндай билеттердің иелері стадионға кіре алмайды, - делінген хабарламада.
«Қайрат» - «Реал Мадрид» арасындағы кездесудің билеттері 23 қыркүйек күні сағат 17:00-де сатылымға шығады. Оларды тек клубтың ресми сайтынан сатып алуға болады. Сол жерде барлық ресми сатылым көздері де көрсетілген.
УЕФА Чемпиондар лигасының топтық кезеңіндегі бұл ойын 30 қыркүйекте Алматыда өтеді. Бұған дейін матч билеттерінің санаттары мен бағалары жарияланған болатын:
Солтүстік/Оңтүстік трибуналар — 75 мың теңге;
Шығыс трибуна — 150 мың теңге;
Батыс трибуна — 250 мың теңге;
Батыс трибуна (1-9 сектор, 1-2 қатар) — 30 мың теңге.
Сонымен қатар, бір адамға бар болғаны екі билет алуға рұқсат етіледі. Әрбір билет сатып алушының ЖСН-іне тіркеледі. Бұл шара қайта сатылымның алдын алу үшін енгізілген.
