Қазақстанның кәсіпқой бокс федерациясының президенті Рахымжан Ерденбеков әлем чемпионы Жәнібек Әлімханұлының В допинг-сынамасын ресми түрде ашу қашан өтетінін жариялады, деп хабарлайды Qaz365.kz.
Федерация басшысы жанкүйерлердің сауалына жазған жауабында допинг-сынаманы ашу рәсімі 8 қаңтарда өтетінін мәлімдеді. Бұл туралы ол әлеуметтік желідегі пікірлердің бірінде жазған.
Бұған дейін Қазақстанның кәсіпқой бокс федерациясы В сынамасын ашу жоспарланып отырғанын хабарлағанымен, нақты күн айтылмаған еді. Көпшілік тарапынан қойылған сұрақтардан кейін Рахымжан Ерденбеков рәсімнің нақты уақытын атады.
Сарапшылардың пікірінше, егер Жәнібек Әлімханұлы әлем чемпионы атақтарынан айырылатын болса, оның кәсіпқой бокстағы жағдайы күрделене түсуі мүмкін. Мамандар мұндай жағдайда қазақстандық боксшыға лайықты қарсылас табу қазіргіге қарағанда әлдеқайда қиын болатынын атап өтеді.
