Ақпанның басында орынбасарымен болған төбелестен кейін қызметінен кеткен
Серік Сәпиев Қазақстан бокс федерациясы президентінің боксты дамыту жөніндегі кеңесшісі қызметіне тағайындалды. Бұл жөнінде бокс федерациясы мәлімдеді, деп хабарлайды Qaz365.kz.
Қазақстан бокс федерациясы Президентінің боксты дамыту жөніндегі кеңесшісі қызметінде Серік Сәпиев бокс құрамаларының нәтижесін жақсарту, спорт түрін дамыту бойынша жүйелі жұмыс пен Олимпиада ойындарындағы жоғары жетістік жолында жұмыс атқарады.
Еске сала кетейік, Серік Сәпиев ақпанның басында орынбасарымен болған төбелестен кейін қызметінен кеткен. Ол Қарағанды облысының дене шынықтыру және спорт басқармасының басшысы болған. Қызметінен кеткеннен кейін Серік Сәпиев көп ұзамай ақ туризм және спорт министрінің штаттан тыс кеңесшісі болып тағайындалған болатын.
Серік Жұманғалиұлы Сәпиев 1983 жылы дүниеге келген. Бокстан Олимпиада ойындарының жеңімпазы. Екі дүркін әлем және Азия чемпионы. ҚР Еңбек сіңірген спорт шебері. Парасат орденінің, Вэл Баркер Кубогінің иегері.
2017-2019 жылдары Парламент Мәжілісінің депутаты болған.
