Жеңісті біздің боксшыға да, сол секілді үндіге де беруге болады
Бокстан Марокко ұлттық құрамасын жаттықтырушы қазақстандық Ерік Алғабек Ташкентте бокстан өтіп жатқан 2023 жылғы Әлем чемпионатында өнер көрсеткен жерлесіміз Сәкен Бибосыновқа қатысты төрешілердің даулы шешіміне пікір білдірді, деп хабарлайды Qaz365.kz тілшісі Sports.kz сайтына сілтеме жасап.
Айта кетсек, 7 мамырда 51 келіге дейінгі салмақ дәрежесінде өнер көрсеткен жерлесіміз 1/16 финалда үндістандық Дипак Кумармен жұдырық түйістіріп, күтпеген жерден ұпай бойынша жеңіліп қалды. Осылайша, Сәкен Бибосынов әлем чемпионатын мерзімінен бұрын аяқтады. Төрешілердің бұл даулы шешіміне қатысты Қазақстан бокс федерациясы IBA-ға ресми шағым жолдады.
Осы жайтқа қатысты бокстан Марокко ұлттық құрамасын жаттықтырушы қазақстандық Ерік Алғабек өз пікірін білдірді.
"Тең ойын, негізі. Жеңісті біздің боксшыға да, сол секілді үндіге де беруге болады. Біздің тараптың шағым жолдағанын естідім. Бірақ, менің ойымша, мұндай жекпе-жектер қарастырылмайды", - дейді белгілі маман.
