Бұған дейін депутаттар тоғызқұмалақ ойынының атауын өзгертуді ұсынған еді
Вице-премьер Тамара Дүйсенова тоғызқұмалақ ойынының атауын өз қалпында қалдырғанды жөн деп санайды, деп хабарлайды Qaz365.kz.
Бұған дейін депутаттар тоғызқұмалақ ойынының атауын өзгертуді ұсынған еді. Дүйсенованың оған берген жауабында әлемдік тәжірибеде бірдей ойындардың, заттардың, құбылыстардың әр тілде әртүрлі атауларды кездестіруге болатынын хабарлайды. Мысалы, әлемде футболды ағылшындар «футбол», италиялықтар «кальчо», америкалықтар «соккер» дейді. Зияткерлік ойынның бірі шахматты алсақ, оны бір елдерде «шатран», тағы бір елдерде «чесс», басқалары «шахмат» дейді. Түркі халықтарында да бірдей ойындар әр түрлі атаулармен аталады. Мысалы, қырғыз халқы «асық атуды» - «ордо», «күресті» - «алыш», «көкпарды» - «көк-бөру» деп атайды.
Сонымен қатар «тоғызқорғоол» атауы қырғыз халқына, ал «мангала» аты түрік халқына тиесілі.
«Халықтың жадында, сондай-ақ А. Краснов, Н. Пантусов, Б. Куфтин, Р. Карутц, М. Балақаев, Ә. Ақшораев, С. Аманжолов, С. Тілеубаев пен басқа да көптеген ғалымдардың еңбектерінде және М. Әуезовтың шығармаларында ойын «тоғызқұмалақ» деп аталады. Оған қоса, қазақ халқына тиесілі мыңжылдық тарихы бар тоғызқұмалақ атауын өзгерту федерацияның да, басқа ұйымдардың да құзыретіне кірмейді. Жоғарыдағыны ескере отырып, ұлттың мәдени мұрасы болып табылатын мыңжылдық тарихы бар тоғызқұмалақ ойынының атауын өз қалпында қалдырғанды жөн деп санаймыз», - делінген жауапта.
