Жергілікті рейдтер барысында 29 шетелдік анықталды
Алматыда Африка құрлығынан келгендер зауытта заңсыз жұмыс істеп келген, деп хабарлайды Qaz365.kz.
Бұл туралы Алматы қалалық Полиция департаментінің баспасөз қызметі мәлімдеді.
“Алматыда көші-қон заңнамасын бұзу деректерін анықтауға және алдын алуға бағытталған “Заңсыз келуші” республикалық жедел-профилактикалық іс-шарасы жүргізілуде. Жергілікті рейдтер барысында 29 шетелдік анықталды. Олардың 25-і қаладағы құрылыс нысандарында жұмыс істесе, тағы төртеуі Африка контингентінен келіп зауытта жалпы еңбек міндеттерін атқарған. Тағы екі шетелдік заңсыз жолаушылар тасымалдап, такси жүргізушісі болып жұмыс істеген. Шетелдіктердің барлығы Қазақстан Республикасының көші-қон заңнамасын бұзғаны үшін жауапқа тартылды”, – деді Алматы қалалық ПД көші-қон қызметі басқармасының бастығы Еркін Амантаев.
Алматы полициясы көші-қон ережелерін сақтау елдегі құқық тәртібі мен қауіпсіздікті қамтамасыз етудің маңызды аспектісі екенін еске салып отыр.
