Мал ұрлығына 131 адамның қатысы бары анықталды
Еліміздің үш өңірі Алматы, Астана, Шымкентте ал ұрлап, заңсыз соятын 13 цех анықталды, деп хабарлайды Qaz365.kz.
Бұл туралы ҚР Ішкі істер министрлігінің баспасөз қызметі мәлімдеді.
“Мал ұрлығының алдын алу және қылмыстарды ашу мақсатында ІІМ тұрақты түрде алдын алу іс-шараларын өткізді. 11-31 наурыз аралығында кезекті рет республикалық кең ауқымды "Мал ұрысы" жедел-профилактикалық іс-шарасы өткізілді. 21 күндік операция барысында 54 мыңнан астам мал тасымалдаған автокөлік, 17 мыңнан астам сатып алу орындары, 28,5 мың шаруа қожалығы және фермалар тексерілді. - Астана, Алматы және Шымкент қалаларында 13 заңсыз мал сою цехтары анықталды. Полиция мал ұрлығына 131 адамның қатыстылығын анықтады. Сонымен қатар 26 қылмыстық топтың әрекетіне тосқауыл қойылды. Жалпы мал ұрлығының 135 дерегі ашылып, 580-нен астам жануар иелеріне қайтарылды, - деді ІІМ криминалдық полиция департаментінің бастығы Қанат Нұрмағамбетов. Алматы облысында мал ұрыларының екі тобы ұсталды. Олардың бірі жергілікті тұрғындардан 16 ірі қара малды ұрлап, 11 қылмыс жасаған. Ал екінші қылмыстық топ 9 ұрлық жасап, 103 бас ұсақ малды қолды еткен”, – делінген полиция хабарламасында.
Сонымен қатар полиция Жамбыл облысында жергілікті тұрғындардан 28 жылқыны ұрлап әкеткен үш адамнан тұратын топты ұстаған. Уақтылы қабылданған шаралардың нәтижесінде биылғы жылы мал ұрлығы 26%-ға пайызға төмендегенін айта кету керек.
