Оған қатысты тергеу атериалдары сотқа жолданған
ҚР Қаржы мониторингі агенттігі Перизат Қайратқа қатысты тергеудің қорытындылары туралы және оның анасына тағылған айыптар жайында мәлім етті, деп хабарлайды Qaz365.kz.
Агенттіктің Telegram-арнасындағы мәліметке сәйкес, Перизат Қайрат пен оның анасының әрекеттері аса ірі көлемдегі алаяқтық және қылмыстық жолмен алынған кірістерді заңдастыру ретінде сараланған.
«Перизат Қайрат 2021 жылдан 2024 жылға дейін бірнеше рет жұртшылықты мұқтаж балаларға, Палестинадағы жапа шеккендерге және су тасқынынан зардап шеккендерге қайырымдылық көмек көрсету сылтауымен ақша жинауға шақырған. Жалпы ұрланған қаражат көлемі — 3,5 млрд теңге. "Biz Birgemiz Qazaqstan 2030" қоғамдық ұйымына түскен қаражат Қайрат Перизаттың және оның анасы Алашбаева Гүлнардың жеке шоттарына аударылып отырған. Кейін бұл қаражат зергерлік бұйымдарға, киімге, жиһазға, саяхаттарға, жөндеу жұмыстарына, көлік жалдауына және басқа да жеке шығындарға жұмсалған», — делінген хабарламада.
Айыптау нұсқасына сәйкес, 2024 жылдың 1 сәуірі мен 15 қарашасы аралығында Перизат Қайрат су тасқынынан зардап шеккендерге көмек көрсету сылтауымен "Biz Birgemiz Qazaqstan 2030" ұйымының шотына 2,8 млрд теңге жинап, бұл қаржыны жымқырған.
АФМ мәліметінше, қылмыстық табысты заңдастыру мақсатында ол 16 жалған жеке кәсіпкермен шарт жасасып, зардап шеккендерге арналған темір киіз үйлер, қайықтар, етік және басқа да тауарларды жеткізу бойынша жұмыстарды орындамаған.
«Нәтижесінде 1 миллиард теңгеден астам қаражат қолма-қол ақшаға айналдырылып, жеке мақсаттарға жұмсалған. Бұл соманың ішінде 72 млн теңге Перизат Қайрат анасы Алашбаева Г-ның атындағы жеке кәсіпкерлікке аударған. Бұл ақша Солтүстік Қазақстан облысындағы зардап шеккендерге тұрмыстық техника алу үшін бөлінген деген желеумен қолма-қол алынып, оның бір бөлігі 6,9 млн теңгеге Rolex сағатын сатып алуға жұмсалған», — делінген агенттік хабарламасында.
2024 жылдың қаңтар айында Қайрат Перизат Палестина тұрғындарына көмек ретінде жиналған қаражаттың бір бөлігін 23 млн теңгеге "Rebel Flowers" ЖШС-сін сатып алуға жұмсаған. Алайда, құжатта ұрлық күдігін болдырмау үшін бұл соманы 2 млн теңге деп көрсеткен. Бұл гүл бизнесінен ол 69 млн теңге табыс тапқан.
Сонымен қатар, Қайрат ұрланған ақшаны мыналарды сатып алуға пайдаланғаны анықталды: 4 автокөлік, 4 пәтер, 2 автотұрақ орны, бір үй, жер учаскесі және құрылыс нысаны. Оның иелігінен зергерлік бұйымдар, аяқ киім мен сөмкелер тәркіленді, жалпы құны — 158 млн теңге.
«Қылмыстық жолмен алынған 865 млн теңге көлеміндегі мүлікке бұғат қойылды. Алашбаева Гүлнарға қатысты үй қамақ түріндегі бұлтартпау шарасы қолданылды», — деп хабарлады агенттіктің баспасөз қызметі.
Айта кетейік, бұған дейін Қаржы мониторингі агенттігі төрағасының орынбасары Жеңіс Елемесов Сенат кулуарында Перизат Қайратқа қатысты тергеу аяқталғанын мәлімдеген болатын. Іс материалдары сотқа жіберіледі.
