Қылмыстық схема арнайы жабдықталған кеңседе жүзеге асырылған
Жетісу облысында тұрғындарға 67 миллион теңге шығын келтірген ұйымдасқан қылмыстық топтың ісі әшкереленді, деп хабарлайды Qaz365.kz.
Бұл туралы ҚР Ішкі істер министрлігінің баспасөз қызметі мәлімдеді.
“Жетісу облысында ондаған азаматты алдап, 67 миллион теңге көлемінде шығын келтірген ұйымдасқан қылмыстық топқа қатысты тергеу аяқталып, іс сотқа жолданды. Күдіктілердің бірі – Қарағанды облысы, Абай қаласының 19 жастағы тұрғыны, ол топтың белсенді мүшесі болған. Қылмыстық схема арнайы жабдықталған кеңседе жүзеге асырылған. Онда компьютерлер, байланыс құралдары және ондаған SIM-картамен жабдықталған заңсыз "call-орталық" құрылған. Қызметкерлер өздерін банк, мобильді операторлар мен мемлекеттік органдардың қызметкерлері ретінде таныстырып, азаматтарға қоңырау шалып, смартфондарына зиянды қосымшаларды орнатуға көндірген. Осы қосымшалар арқылы алаяқтар жәбірленушілердің смартфондарына қашықтан кіріп, олардың атына онлайн несие рәсімдеп, ақшаны өздеріне тиесілі шоттарға аударып отырған. Қылмыстық схемада "қолма-қол ақшаға айналдыру" тобы маңызды рөл атқарған. Олар Telegram мессенджері арқылы дропперлердің (ақша түсетін шот иелерінің) деректерін сатып алып, олардың банк қосымшаларына қол жеткізген. Тергеу материалдарына сәйкес, күдікті жас жігіт дәл осы топтың құрамында болған. Мысалы 2023 жылы алаяқтар жәбірленушілердің бірінің телефонына қол жеткізіп, оның атына 20 миллион теңгеден астам сомаға несие рәсімдеп, ақшаны бақылаудағы шоттар арқылы шешіп алған. 2023 жылдың наурыз айынан 2024 жылдың маусымына дейін күдікті ұйымдасқан қылмыстық топ құрамында болып, көмекші рөлін атқарған. Оған алдын ала сөз байласу арқылы, ақпараттық жүйелерді пайдаланып, аса ірі көлемде жасалған алаяқтық дерегі бойынша айып тағылып отыр”, – делінген полиция ақпаратында.
Жәбірленушілерге келтірілген шығын көлемі – 67 миллион теңге. Қазіргі таңда бұл іс сотқа жолданды. Алаяқтық схеманың өзге де қатысушыларына қатысты тергеу жалғасуда.
