Өңірде жыл басынан бері 408 интернет-алаяқтық дерегі тіркелгеен
Жыл басынан бері Абай облысында 408 интернет-алаяқтық дерегі тіркеліп, 1190-нан аса заңсыз сайттар бұғатталған, деп хабарлайды Qaz365.kz.
Бұл туралы ҚР Ішкі істер министрлігінің баспасөз қызметі мәлімдеді.
“Полиция облыс аймағында профилактикалық жұмысты үздіксіз жүргізіп жатыр. 408 интернет-алаяқтық дерегі өткен жылдың сәйкес кезеңімен салыстырғанда 55,7%-ға көп. Осы жылы қаңтар айында құрылған киберқылмысқа қарсы күрес басқармасы интернет-алаяқтықтың 17 эпизоды бойынша 11 күдіктіні ұстады. 1 190-нан астам заңсыз сайт бұғатталды. Маңызды құралдардың бірі — полиция мен екінші деңгейлі банктерді онлайн режимде біріктіретін "Антифрод орталығы" жүйесі. Жыл басынан бері бұл жүйеге 1 056 инцидент тіркеліп, 392 алаяқ есепшот иесі (дроппер) анықталды. 16,5 млн теңгеден астам қаражат бұғатталып, соның ішінде 9,8 млн теңгеден астамы жәбірленушілерге қайтарылды. Бір рейд барысында полиция ҰҚКД қызметкерлерімен бірлесіп, Семей қаласында SIM-box деп аталатын заңсыз құрылғыны тәркіледі. Бұл құрылғы виртуалды нөмірлер арқылы алаяқтыққа пайдаланылған. 60 жастағы тұрғын ұсталып, сотқа дейінгі тергеу амалдары жүргізілуде”, – делінген полиция ақпаратында.
Полиция азаматтарды сақ болуға шақырады: бөгде адамдарға жеке және банк деректеріңізді бермеңіз, күмәнді сілтемелерге өтпеңіз, ақпарат көздерінің шынайылығын тексеріңіз.
