Талғардағы Хасан Қасымбаевтың ісі сотқа жіберілді
Бүгін Алматы облыстық прокуратурасы Хасан Қасымбаевтың үстінен қозғалған қылмыстық іс сотқа жолданғанын растады. Іс материалдары мен айыптау актісі 21 шілдеде облыстық прокуратураға берілген, деп хабарлайды Qaz356.kz.
«Алматы облысының прокуратурасы 2025 жылғы 29 шілдеде айыптау актісін бекітіп, істі мәні бойынша қарау үшін Талғар аудандық сотына жолдады», — деп мәлімдеді қадағалаушы орган өкілдері.
Хасан Қасымбаевтың үстінен «адам ұрлау», «денсаулыққа қасақана ауыр зиян келтіру» және «қорқытып алу» баптары бойынша іс қозғалған.
Хасан Қасымбаев деген кім
Қоғамда көпшілік оның есімін атышулы «Хуторлықтар» деп аталатын ұйымдасқан топпен байланыстырады. Дегенмен, Ішкі істер министрлігі мұндай қылмыстық топтың барын ресми түрде жоққа шығарады.
Оның есімі көпшілікке 2024 жылдың соңында 16 жастағы Шерзат Болаттың өліміне қатысты істен кейін таныла бастады. Жергілікті тұрғындар мен кейбір ақпарат құралдары оны бейресми түрде «Хуторлықтар» деп аталатын қылмыстық топтың жетекшісі ретінде атайды. Алайда Қасымбаев бұл айыптауларды мойындамайды. Ол өзінің ешқашан сотталмағанын, ұйымдасқан қылмыстық топқа мүше емес екенін мәлімдеді. Сонымен қатар, қорғаушысы арқылы жалған ақпарат таратқандарды сотқа беруге ниетті екенін жеткізген.
