Қылмыстық істер жөніндегі ауданаралық сотта Шымкент қаласы әкімінің орынбасары Руслан Берденовке қастандық жасауға қатысты іс бойынша үкім шығарылды, деп хабарлайды Qaz365.kz.
Ернар Жиембайға 9 жыл бас бостандығынан айыру жазасы тағайындалды.
Ол орташа қауіпсіздік мекемесінде жазасын өтейді. Сонымен қатар, ол жәбірленушінің пайдасына 30 айлық есептік көрсеткіш (117 960 теңге) көлемінде өтемақы төлеуге міндеттелді.
Сот отырысында айыпталушы соңғы сөзін айтып, өз әрекеттерін «қасақана денсаулыққа ауыр зиян келтіру» бабы бойынша қайта саралауды сұрады. Сондай-ақ, шын жүректен өкінетінін айтып, бас бостандығынан айырмайтын жаза тағайындауды өтінді.
Айта кетейік, Ернар Жиембайдың ісі сотқа Қылмыстық Кодекстің «Адам өлтіру» бабы және «Қылмысқа дайындалу және қылмысқа оқталу» бабымен түскен. Іс өндіріске 22 шілде күні қабылданған. Басты сот талқылауы 6 тамыз күні басталған. Жәбірленуші денсаулығына байланысты әзірге сот тергеуіне қатыспады.
