ҚМА деректеріне сүйенсек, 18 блогер әкімшілік жауапкершілікке тартылған.
Қаржылық мониторинг агенттігі төрағасының орынбасары Қайрат Бижанов онлайн-казино жарнамалаған блогерлерге қылмыстық жауапкершілік енгізуді ұсынды, деп хабарлайды Qaz365.kz.
Үкімет отырысында Бижановтың айтуынша, әлеуметтік желілерде онлайн-казино жарнамасы жаппай сипат алып, қоғамда ойынқұмарлыққа тәуелділіктің көбеюіне әкеліп отыр.
Қаржылық мониторинг агенттігінің деректеріне сүйенсек, 18 блогер әкімшілік жауапкершілікке тартылған, ал барлығы 37 инфлюенсер онлайн-казиноны жарнамалаған.
Олардың көбі – кездейсоқ емес, заңды жүйелі түрде бұзатын адамдар. Мәселені күрделендіріп тұрғаны – құмар ойындарын жарнамалағаны үшін нақты қылмыстық жауапкершілік қарастырылмаған, ал қазіргі әкімшілік айыппұлдар олардың табысымен салыстырғанда өте аз, – деді Бижанов.
Осыған байланысты агенттік онлайн-казино жарнамалағандарға қылмыстық жаза қолдануды ұсынды. Бұл шара қаржы пирамидаларына қарсы заң нормаларына ұқсас болмақ.
Ұсынысты үкімет қолдады.
Айта кетейік, бұған дейін хабарланғандай, жыл басынан бері Қазақстанда 34 блогердің онлайн-құмар ойындарын жарнамалағаны анықталды. Оның ішінде 11-і әкімшілік жазаға тартылды, ал 23 блогерге қатысты материалдар Мәдениет және ақпарат министрлігіне шара қолдану үшін жолданған.
