Қазақстанда биылғы 11 ай ішінде ойын-сауық орындарында тіркелген құқық бұзушылықтар бойынша 42 мыңға жуық өтініш түскен, оның 1 749-ы қылмыстық іске ұласқан. Бұл деректерді ішкі істер вице-министрі Санжар Әділов Сенатта өткен брифингте жариялады, деп хабарлайды Qaz365.kz.
ІІМ мәліметінше, елде әр екінші адам өлімі мас адамның қолынан болады. Ал дәл ойын-сауық орындарында болатын құқық бұзушылықтардың 25%-ы алкоголь әсеріндегі әрекеттермен байланысты.
Биыл осы санаттағы қылмыстар бойынша:
10 кісі өлімі,
579 дене жарақаты,
8 зорлау,
26 тонау,
238 бұзақылық тіркелген.
Әділовтің айтуынша, Астанада ойын-сауық орындарындағы қылмыс айтарлықтай жиілеген.
Қаладағы 171 мекемеде 357 қылмыс жасалған.
Полицияға түскен 3 431 шақыртудың 90%-ы — түнгі 23:00-ден кейін.
Ең көп шақырту түскен орындар:
«Панаехали» — 958 рет,
«Забери меня» — 349 рет,
«Мята» — 262 рет.
Бұл мекемелердің бірқатары қылмыстың жиі қайталануымен көзге түсіп отыр.
Алматыда жыл басынан бері 3 588 шағым тіркелген, сондай-ақ 14-тен астам кісі өлімі анықталған.
ІІМ түнгі уақытта тәртіпті күшейтіп, ойын-сауық орындарындағы құқық бұзушылықтардың алдын алуға бағытталған шараларды жалғастырып жатқанын хабарлады.
