Оқиғаға қатысты министрлік тарапынан тиісті шаралар қолданылған
Желіде Батыс Қазақстан облысындағы мектеп оқушылары ҰБТ тапсыруға трактормен барғаны туралы бейнежазбаға қатысы Ғылым және жоғары білім вице-министрі Дархан Ахмед-Заки пікір білдірді, деп хабарлайды Qaz365.kz.
Оның айтуынша, бейнежазбадағы оқиғаға қатысты министрлік тарапынан тиісті шаралар қолданылған.
«Мен бұл бейнежазбаны көрдім. Жауапты тұлғалар жазасын алды. ҰБТ аясында тест тапсыру жүйесін жергілікті атқарушы органдар, жалпы біздің тестілеу орталығы қамтамасыз етуі тиіс. Наурыз айының қорытындысы бойынша Ұлттық бірыңғай тестілеуді 117 мыңнан астам түлек тапсырды», - деді ол.
Ол мектеп оқушыларының келесі ҰБТ-ны маусым айында тапсыратынын атап өтті.
Еске салайық, БҚО-да 11-сынып оқушылары тест тапсыруға трактормен барғанын жазған едік.