Қазақстанда 15 сәуірден бастап салық органдары екінші деңгейлі банктерден түскен деректер негізінде азаматтардың мобильді аударымдарын талдауға кірісті. Бұл шара тіркелмеген кәсіпкерлік қызметті анықтау мен көлеңкелі экономиканы қысқартуға бағытталған. Бұл туралы Қаржы министрлігі мен Мемлекеттік кіріс комитеті мәлім етті, деп хабарлайды Qaz365.kz.
Жаңа ережеге сәйкес, қатарынан үш ай бойы ай сайын 100 және одан көп түрлі тұлғадан ақша түскен шоттар бақылауға алынады. Тексеруге ілігу үшін түскен қаржының жалпы сомасы 12 ең төменгі жалақыдан (2026 жылы — 1 020 000 теңге) асуы тиіс. Күмән тудырған тұлғаларға мамыр айынан бастап e-Salyq Azamat немесе SMS арқылы хабарлама жіберіледі. Азаматтарға қаржының мақсатын түсіндіру үшін 30 жұмыс күні беріледі.
Ресми мәлімет бойынша, туыстар арасындағы көмек, сыйлықтар немесе ортақ шығындарға жиналған қаражат салық салынбайтын аударымдар қатарына жатады. Түсініктеме ретінде чат скриншоттары немесе тиісті анықтамалар қабылдануы мүмкін. Алайда, заңсыз кәсіпкерлік әрекеті дәлелденген жағдайда, азаматтарға 15-тен 100 АЕК-ке дейін айыппұл салынып, табысын жасырғаны үшін қосымша төлемдер есептеледі.
Билік бұл қадамның қарапайым азаматтарға емес, жүйелі түрде табыс тауып, бірақ салық төлеуден қашатын кәсіпкерлерге бағытталғанын алға тартады. Сарапшылардың пікірінше, бұл шара үйден қызмет көрсететін мамандар мен фрилансерлердің қызметін заңдастыруға ықпал етпек.