Қалған үш кеншіні іздеу жұмыстары жалғасуда
«АрселорМиттал Теміртау» көмір департаментінің «Казахстанская» шахтасында екі кеншінің мәйіті табылды. Бұл туралы Қарағанды облысының әкімдігі мәлімдеді, деп хабарлайды Qaz365.kz.
Қалған үш кеншіні іздеу жұмыстары жалғасуда.
Еске салайық, бүгін сағат 10:05-те D6 көмір еңісін игеруде (горизонт – 170 м) конвейер лентасы өртенген болатын. Төтенше жағдай кезінде шахтада 227 кенші болған. 13 адам бас ауруы, жөтел шағымдарымен оқиға орнында дәрігерлерге жүгінген. Төртеуі ауруханаға жатқызылды: екеуі Шахтинск орталық ауруханасына, екеуі Мақажанов емханасына. Зардап шеккендердің екеуі жеңіл дәрежелі көмірқышқыл газымен уланса, қалғандары көміртегі тотығымен уланған.