Әкімдік апаттың себебін жариялады
Астана қаласы әкімінің бірінші орынбасары Нұрлан Нұркенов кешегі төтенше жағдайдың себебін жариялады, деп хабарлайды Qaz365.kz.
Кеше қосалқы станцияда электр ажыратқыштың басы жарылып, электр шкафтың үстіне құлаған.
«Сөйтіп, салбырап тұрғанда басқа фазаны тұйықтап тастаған. Одан кейін тұрақты токтың екі автоматы өшіп қалды. Ал ЖЭС-2 станциясының жүктемесі нөлге дейін түсіп кетті», – деді Нұркенов.
Оның айтуынша, төтенше жағдай кезінде қаладағы он қосалқы станция сөніп қалған. Соның салдарынан Есілдің оң жағалауында жарық өшті.
«Түнгі сағат 2:00-ге дейін барлық қосалқы станция іске қосылды. Ешқандай технологиялық ақаулық болған жоқ. ЖЭС-2 штаттық режимде істеп тұр. Апаттық жағдай оған келетін желілерде болды. Қарапайым сөзбен айтсақ, кабельден ақаулық шығып, электр шкафтардың біреуі жанып кетті. Бұл мәселе 1,5 сағаттың ішінде шешілді», – деп атап өтті әкімнің орынбасары.
Энергетика министрлігі Атомдық және энергетикалық қадағалау мен бақылау комитетінің төрағасы Сұңғат Есімхановтың айтуынша, бүгінде Астанада 500 мыңнан астам абонент тіркелген.
«Ал жарық өшкенде шамамен 100 мың абонент электр қуатынсыз қалды. Сонда қала тұрғындарының 20 проценті бір жарым сағаттай жарықсыз отырды», – деді ол.