Ол кінәлі деп танылды
Павлодар қаласы әкімінің орынбасарына қатысты үкім шықты. Арслан Қалияқбаров 3 жыл 6 айға бас бостандығынан айырылды, деп хабарлайды Qaz365.kz.
10 қарашада Павлодар қаласы №2 сотында экс-шенеунікке қатысты үкім шықты. Алайда айыпталушының өзі денсаулық жағдайына байланысты сот отырысына қатыса алмаған.
Арслан Қалияқбаров Қылмыстық кодекстің 366-бабы 2-бөлігі (Аса ірі мөлшерде пара алу) бойынша кінәлі деп танылып, 3,5 жылға бас бостандығынан айырылды.
Айта кетейік, биыл маусымда Павлодар әкімінің орынбасары ұсталғаны хабарланған. Антикор мемқызметші кәсіпкерден жол жөндеуге қатысты атқарылған жұмыстарды қабылдау актілеріне кедергісіз қол қоюы үшін пара алды деген күдікпен ұсталғанын мәлімдеген.
Кейіннен сыбайлас жемқорлыққа қарсы қызмет бұл істегі пара сомасын да атаған – 1,8 млн теңге. Шенеунік өзіне қатысты айыптауды арандату деп атаған. Прокурор оны 9 жылға бас бостандығынан айыруды сұраған.