Данат Намазбай халықтан көмек сұрады
«Ұлтаралық араздықты қоздырды» деген желеумен 5 жылға сотталған Данат Намазбай шартты түрде босату туралы арыз жазатынын және халықтан отбасына қолдау көрсетуді сұрады, деп хабарлайды Qaz365.kz.
«Қымбатты достар, мен қалаған нәрсе орындалмады. Белгілі бір жағдайларға байланысты босатпады. Сіздердің белсенді араласуларыңызбен көп нәрсеге қол жеткізілді. Енді шартты түрде босатуды күтіп, апелляциялық шағым түсіремін», – дейді Данат Намазбай.
Ол аздап денсаулығы сыр бергені болмаса, бәрі жақсы екенін айтты.
«Мен уақытымды лагерь рұқсат еткендей пайдалы етіп өткіземін. Кітап оқимын, мұңайып, дүниені сағынып жүрмін. Бірақ бәрі өтеді де кетеді.
Ең бастысы «меніңді» жоғалтпау, сол есіммен, абыроймен қалу. Тіпті зындандарда да біз өсуді және дамуды жалғастырамыз. Мүмкіндігінше отбасыма көмектесуді сұраймын», – делінген хатта.
Айта кетейік, Марғұлан Боранбаев пен Данат Намазбаев «ұлтаралық араздықты қоздырды» деген желеумен әрқайсысы 5 жылға сотталып кеткен еді.
Еске салайық, бұған дейін Парламент Мәжілісінің депутаты Ермұрат Бапи Қазақстанның Жоғарғы сотынан Марғұлан Боранбаев пен Данат Намазбаевқа қатысты Сот Үкімін қайтадан қарауға, оларды түрмеден босатуға пәрмен беруді сұраған еді.