Балтамен шабуыл жасаған
Петропавлда үш оқушыға балтамен шабуыл жасаған жасөспірімге қатысты үкім шығарылды, деп хабарлайды Qaz365.kz.
Солтүстік Қазақстан облысының қылмыстық істер жөніндегі мамандандырылған ауданаралық соты ҚР Қылмыстық кодексінің 99-бабы (Екі немесе одан да көп адамды өлтіруге оқталу) бойынша 6 жыл 9 айға бас бостандығынан айыру жазасын тағайындады.
Ол жазасын кәмелетке толмағандарды қамауда ұстау үшін қылмыстық-атқару жүйесінің орташа қауіпсіздік мекемесінде өтейді. Жәбірленушілердің пайдасына моральдық шығын өндірілген.
Бұл жантүршігерлік жағдай 13 ақпанда болған еді. 9-сынып оқушысы білім беру мекемесіне өзімен бірге пышақ пен балта кіргізген. Кейіннен ол екінші қабаттағы әжетханада маскасын киіп, балтамен дәлізге жүгіріп шығып, оқушыларды ұрған болатын. Шабуыл жасаған оқушыны жоғары сынып оқушылары мен мұғалімдер ұстаған. Судьяның айтуынша, оқушы мұндай әрекетке өз тарапына айтылған сөздерден кейін барған. Оның қылмыс жасауына америкалық кинофильм түрткі болған көрінеді.