29 қазан Жалпыұлттық аза тұту күні болып жарияланды
Франция президенті Эмманюэль Макрон Костенко шахтасындағы қайғылы жағдайға байланысты Қазақстан халқына қазақ тілінде көңіл айтты, деп хабарлайды Qaz365.kz.
«Қазақстанға ресми сапарыма, қазақ халқына деген достық қарым-қатынасымды көрсетуге бірнеше күн қалғанда ел шахталарының біріндегі қайғылы жағдай туралы хабар келді. Шахтада қаза болғандардың туыстары мен жақындарына көңіл айтамын», – деп жазды Эмманюэль Макрон Facebook желісінде.
1 қарашада Мемлекет басшысы Қасым-Жомарт Тоқаевтың шақыруымен Франция президенті Эмманюэль Макрон Қазақстанға ресми сапармен келеді.
Франция басшысынан бөлек, апатқа байланысты Ресей, Беларусь, Қырғызстан, Өзбекстан президенттері мен Түркия Сыртқы істер министрлігі де көңіл айтты.
Кейіннен Қасым-Жомарт Тоқаев Қарағанды облысындағы қайғылы оқиғаға орай көңіл айтқан барлық шет мемлекеттер басшылары мен қазақстандықтарға ризашылығын білдірді.
Айта кетейік, бүгін түнде Қарағанды облысындағы Костенко атындағы шахтада өрт болды. Соңғы мәлімет бойынша 33 кеншінің денесі табылды. Әлі 13 адам іздестіріліп жатыр.
29 қазан Жалпыұлттық аза тұту күні болып жарияланды.