Қазақстанның арнайы ХҚКО-ларында ақау шықты
Қазақстандықтарда жүргізуші куәлігін ауыстыруда қиындықтар пайда болды, деп хабарлайды Qaz365.kz тілшісі Tengrinews.kz-ке сілтеме жасап.
Редакцияның WhatsApp-нөміріне жүргізуші куәлігін ауыстырмақ болған Алматы тұрғыны хабарласты. Бірақ ол мұны арнайы ХҚКО арқылы да, екінші деңгейлі банк қосымшасы арқылы да орындай алмаған.
Осыған байланысты Tengrinews.kz редакциясы пікір алу үшін "Азаматтарға арналған үкімет" мемлекеттік корпорациясына жүгінді. Ведомство қазіргі уақытта арнайы ХҚКО жұмысында шынымен де қиындық бар екенін растады.
"Қазақстан бойынша Ішкі істер министрлігінің көлік құралдарын тіркеу ақпараттық жүйесінің дұрыс жұмыс істемеуіне байланысты арнайы ХҚКО-да шетелдік автокөліктерді заңдастыруға құжаттарды қабылдау уақытша тоқтатылды.
Жауапты қызметтер жүйе өнімділігін қалпына келтіру бойынша жұмыс істеп жатыр. Арнайы ХҚКО-да қабылдауды қалпына келтіру туралы кейінірек хабарланады. Қолайсыздықтар үшін кешірім сұраймыз", - деді "Азаматтарға арналған үкімет" мемлекеттік мекемесінің Алматы қаласы бойынша филиалының PR менеджері Жаңыл Әпетова.